ກອງປະຊຸມຄະນະຊີ້ນຳ
ໂຄງການສົ່ງເສີມລະບົບຕ່ອງໂສ້ການຜະລິດກະສິກຳເປັນສິນຄ້າທີ່ເປັນມິດຕໍ່ສິ່ງແວດລ້ອມ
ຄັ້ງວັນທີ 09-10 ມິຖຸນາ 2022 ທີ່ໂຮງແຮມແລນມາກລີເວີຊາຍ, ນະຄອນຫຼວງວຽງຈັນ
ກອງປະຊຸມຄະນະຊີ້ນຳໂຄງການສົ່ງເສີມລະບົບຕ່ອງໂສ້ການຜະລິດກະສິກໍາເປັນສິນຄ້າ ທີ່ເປັນມິດຕໍ່ສິ່ງແວດລ້ອມ ໄດ້ຈັດຂື້ນຢ່າງເປັນທາງການທີ່ຫ້ອງປະຊຸມໂຮງແຮມແລນມາກແມ່ຂອງລີເວີຊາຍ, ນະຄອນຫຼວງວຽງຈັນ, ໃນຕອນເຊົ້າ ເວລາ 08 ໂມງ 30 ນາທີ ຂອງວັນທີ 09 ເດືອນມຸຖຸນາ 2022 ເຊີ່ງໄດ້ຮັບກຽດການເປັນປະທານໂດຍ ທ່ານ ກິແກ້ວ ສິງນາວົງ ຮອງລັດຖະມົນຕີ ກະຊວງກະສິກຳ ແລະ ປ່າໄມ້ ແລະ ຮັບກຽດຮ່ວມເປັນຄະນະປະທານຈາກ ທ່ານ ປອ ສົມສະອາດ ອຸ່ນສີດາ ຮອງເຈົ້າແຂວງຄຳມ່ວນ, ທ່ານ ນ ຫຼີງທອງ ແສງຕາວັນ ຮອງເຈົ້າແຂວງສະຫວັນນະເຂດ ແລະ ທ່ານ ປອ ສຸກສະຫວັນ ວິໄລວົງ ຫົວໜ້າພະແນກແຜນການ ແລະ ການຮ່ວມມືແຂວງຈຳປາສັກ ເປັນປະທານຮ່ວມກອງປະຊຸມໃນຄັ້ງນີ້ດ້ວຍ.
ກອງປະຊຸມໄດ້ມີບັນດາ ທ່ານຫົວໜ້າກົມ, ຮອງຫົວໜ້າກົມ, ຜູ້ຊີ້ນຳອົງປະກອບດ້ານເຕັກນິກກົມ ສົ່ງເສີມສົ່ງເສີມກະສິກຳ ແລະ ສະຫະກອນ, ກົມຊົນລະປະທານ, ກົມຄຸ້ມຄອງ ແລະ ພັດທະນາທີ່ດິນກະສິກຳ, ກົມພັດທະນາຊົນນະບົດ, ສະຖາບັນຄົ້ນຄວ້າກະສິກຳ, ປ່າໄມ້ ແລະ ພັດທະນາຊົນນະບົດ, ກົມປູກຝັງ, ກົມແຜນການ ແລະການຮ່ວມມື, ມີບັນດາ ທ່ານຮອງຫົວໜ້າພະແນກກະສິກຳ ແລະ ປ່າໄມ້ແຂວງ 5 ແຂວງ ແລະ 1 ນະຄອນຫຼວງ, ບັນດາ ທ່ານຮອງເຈົ້າເມືອງ ຈາກ 19 ເມືອງເປົ້າໝາຍຂອງໂຄງການ, ມີຕາງໜ້າຈາກກະຊວງກະຊວງແຜນການ ແລະ ການລົງທຶນ, ກະຊວງການເງິນ, ກະຊວງອຸດສະຫະກຳ ແລະ ການຄ້າ, ກະຊວງຊັບພະຍາກອນທຳມະຊາດ ແລະ ສິ່ງເວດລ້ອມ, ມີຜູ້ປະສານງານໂຄງການຂັ້ນສູນກາງ, ຜູ້ປະສານງານໂຄງການຂັ້ນແຂວງ , ຜູ້ປະສານງານຂັ້ນເມືອງ, ຜູ້ປະສານງານຈາກບັນດາກົມອົງປະກອບ, ທີມງານທີ່ປຶກສາດ້ານການຈັດຕັ້ງປະຕິບັດໂຄງການ (PIC) , ທີ່ປຶກສາດ້ານການຄຸ້ມຄອງການເງິນ (FME) ແລະ ພະນັກງານປະຈຳຫ້ອງການປະສານງານໂຄງການຂັ້ນສູນກາງ ເຊີ່ງມີຜູ້ເຂົ້າຮ່ວມລວມທັງໝົດ 117 ທ່ານ, ຍິງ 40 ທ່ານ.