ກິດຈະກຳພາກສະໜາມ

ໃນໄລຍະວັນທີ 02-06 ກັນຍາ 2022 ທີ່ຜ່ານມາ ຄະນະປະສານງານໂຄງການ ຄສກສ ຈາກຂະແຫນງປູກຝັງ ໄດ້ລົງສົມທົບ ກັບສູນພັດທະນາກະສິກຳເຊບັ້ງໄຟ, ວິຊາການເມືອງຂອງ 02 ເມືອງເປົ້າໝາຍເພື່ອລົງລົງຕິດຕາມ, ແນະນໍາ ແລະ ນໍາພາຄອບຄົວເຮັດແປງສາທິດໃສ່ຝຸ່ນເລັ່ງ ຄັ້ງທີ02, ການກໍາຈັດສັດຕູພືດ ແລະ ວັດສະພືດໃນແປງສາທິດລະດູຝົນ ປີ2022 ລາຍລະອຽດມີດັ່ງນີ້:

ເມືອງ ໜອງບົກ: ປະກອບມີ 02 ກຸ່ມ ແລະ 06 ຄອບຄົວ ມີເນື້ອທີ່ແປງສາທິດ ຜະລິດແນວພັນເຂົ້າລຸ້ນ3 ທັງໝົດ12.098 ຕາແມັດ ໃນນັ້ນ ມີເນື້ອທີ່ HTDK8 ມີທັງໝົດ 9.369 ຕາແມັດ ແລະ TDK16 ມີເນື້ອທີ່ທັງໝົດ 5.729 ຕາແມັດ.

ເມືອງ ຫິິນບູນ: ປະກອບມີ 03 ກຸ່ມ ແລະ 09 ຄອບຄົວ ມີເນື້ອທີ່ແປງສາທິດ ຜະລິດເຂົ້າເປັນສິນຄ້າ ທັງໝົດ14.232 ຕາແມັດ ໃນນັ້ນ ມີເນື້ອທີ່ HTDK8 ມີທັງໝົດ 6.319 ຕາແມັດ ແລະ XBF4 ມີເນື້ອທີ່ທັງໝົດ 7.913 ຕາແມັດ.

ຜ່ານການລົງຕິດຕາມ ເຫັນວ່າຕົ້ນເຂົ້າມີຄວາມສົມບູນໃນລະດັບດີສົມຄວນ, ບໍ່ມີສັດຕູພືດລຳລາຍ, ວັດສະພືດບໍ່ຫລາຍ ແລະ ສັດຕູພືດມີພຽງເລັກຫນ້ອຍ, ແລະ ການຈະເລີນເຕີບໂຕເຫັນວ່າມີແສງແດດພຽງພໍ, ມີນ້ຳພຽງພໍໃນການຈະເລີນເຕີບໂຕ ແລະ ຄອບຄົວທີ່ເຮັດແປງສາທິດລວມທັງວິຊາການຂັ້ນເມືອງກໍ່ໄດ້ມີຄວາມເອົາໃຈຕໍ່ວຽກງານດັ່ງກ່າວເປັນຢ່າງດີ.

ໃນລະຫວ່າງວັນທີ 26/8-03/09/2022 ທີມງານໂຄງການ ຄສກສ ຂັ້ນແຂວງ ຮ່ວມກັບທີມງານກວດກາຂັ້ນສູນກາງ ລົງຕິດຕາມແນະນຳພະນັກງານຂັ້ນເມືອງລົງສຳຫຼວດສະຖານະພາບດ້ານເສດຖະກິດ ສັງຄົມໃນພື້ນທີ່ບ້ານເປົ້າໝາຍໂຄງການ ກັບພະນັກງານເມືອງ M&E ເມືອງ ໄຊບູລີ, ເມືອງ ຈຳພອນ ແລະ ເມືອງ ຊົນນະບູລີ ຢູ່12 ບ້ານ ເປົ້າໝາຍຂອງໂຄງການ

• ເມືອງ ຈຳພອນ : ກຸ່ມທົ່ງບັກຫຼັກ4, ບ້ານເຫຼົ່າຫົວຄຳ, ບ້ານຍອດຫ້ວຍບັກ ແລະ ບ້ານຄໍ້
• ເມືອງ ໄຊບູລີ : ກຸ້ມບ້ານຫາດຊາຍສູງ, ບ້ານ ນາຊຽງຄານ, ບ້ານກາງ ແລະ ບ້ານດ້າງສະຫວັນ
• ເມືອງ ຊົນນະບູລີ : ກຸ່ມບ້ານຊຽງຮົ່ມ2, ບ້ານທ່າຄຳເຫຼື້ອມ1, ບ້ານນາໜອງຜຳ ແລະ ບ້ານໜອງບົວລາວ

         ການລົງປະຕິບັດໃນຄັ້ງນີ້ໄດ້ຮັບການຕິດຕາມ ແລະ ແນະນຳຈາກທີມງານຂັ້ນສູນກາງ ຈາກກົມສົ່ງເສີມ ແລະ ສະຫະກອນຜູ້ຮັບຜິດຊອບວຽກM&E  ແລະ ຊ່ຽວຊານໂຄງການວຽກM&E  ແລະ ທີມງານທີ່ກ່ຽວຂ້ອງຂັ້ນສູນກາງ ຈຳນວນ 6ຄົນ,ຍິງ1ຄົນ; ທີມງານໂຄງການຂັ້ນແຂວງ ຈຳນວນ 3ຄົນ,ຍິງ1ຄົນ, ປະສານງານຂັ້ນເມືອງ ແລະ ວິຊາການ ທີ່ຮັບຜິດຊອບໃນການລົງເກັບຂໍ້ມູນ ທັງໝົດ12 ຄົນ,ຍິງ4ຄົນ, ອຳນາດການປົກຄອງບ້ານຈຳນວນ36ຄົນ ແລະ ຊາວກະສິກອນທີ່ຖືກສຳພາດໃນ12ບ້ານ ທັງໝົດຈຳນວນ240ຄົນ,ຍິງ 64ຄົນ 

ໃນໄລຍະວັນທີ 15-21 ສິງຫາ 2022 ທິມງານໂຄງການ ຄສກສ ຂັ້ນສູນກາງ ໂດຍສົມທົບກັບຫ້ອງການປະສານງານຂັ້ນແຂວງ, ເມືອງ ແລະ ອົງການປົກຄອງບ້ານ ເພື່ອລົງເຄື່ອນໄຫວວຽກໃນການ ຈັບຈຸດພິກັດ ແລະ ແຕ້ມແຜນວາດ ບັນດາໂຄງການຍ່ອຍພາຍໃຕ້ໂຄງການ ຄສກສ ໃນນັ້ນປະກອບມີ: ເສັ້ນທາງເຂົ້າສູ່ເຂດການຜະລິດ, ໜອງເກັບນ້ຳຝົນ ແລະ ຊົນລະປະທານ ເພື່ອນຳໄປປະກອບເຂົ້າໃນການປະເມີນຜົນກະທົບດ້ານສິ່ງແວດລ້ອມIEE ຢູ່ 03 ເມືອງ ແລະ 21 ເປົ້າໝາຍຂອງໂຄງການຄື: ເມືອງຫິນບູນ ມິຈຳນວນ 09 ບ້ານ, ເມືອງໜອງບົກ ມີຈຳນວນ 08 ບ້ານ ແລະ ເມືອງເຊບັ້ງໄຟ ມີ 04 ບ້ານ.

ວັນທີ 17 ສິງຫາ 2022 ເມືອງຫິນບູນ ສຳເລັດການນຳພາຊາວນາກຸ່ມຜະລິດເຂົ້າເປັນສິນຄ້າຈຳນວນ 02 ບ້ານຄື:ກຸ່ມ ບ້ານ ດອນດູ່ ແລະ ກຸ່ມ ບ້ານ ວັງຫົວປາ ລົງຢ້ຽມຢາມແລກປ່ຽນບົດຮຽນການເຮັດແປງສາທິດ ປູກເຂົ້າລະດູຝົນຢູ່ ກຸ່ມຜະລິດເຂົ້າເປັນສິນຄ້າ ບ້ານ ຫົວນາ ເມືອງຫິນບູນ, ນຳພາຄະນະດັ່ງກ່າວ ໂດຍ ທ່ານ ເພັດສະໃໝ ພະບໍລິບູນ  ຮອງຫົວໜ້າຫ້ອງການກະສິກຳ ແລະ ປ່າໄມ້ເມືອງ ທັງເປັນຜູ້ປະສານງານໂຄງການຄສກສ ຂັ້ນເມືອງ ຊື່ງລວມຜູ້ເຂົ້າຮ່ວມທັງໝົດຈຳນວນ 41ທ່ານ, ຍິງ 10 ທ່ານ ໃນນັ້ນກວມເອົາຜູ້ເຂົ້າຮ່ວມຈາກ ກຸ່ມບ້ານຫົວນາຈຳນວນ 30 ທ່ານ ຍິງ 08 ທ່ານ.

ການລົງຢ້ຽມຢາມ ໃນຄັ້ງນີ້ ກໍ່ເພື່ອເປັນການເປີດໂອກາດໃຫ້ກຸ່ມຊາວນາດ້ວຍກັນ ໄດ້ພົບປະ ແລກປ່ຽນ ຖອດຖອນບົດຮຽນນຳກັນ ໂດຍສະເພາະການຈັດຕັ້ງປະຕິບັດ ເຮັດແປງສາທິດການປູກເຂົ້າເປັນສິນຄ້າ ໃນໄລຍະຜ່ານມາກໍ່ຄືປະຈຸບັນ ວ່າມີຂໍ້ສະດວກ, ຂໍ້ຫຍຸ້ງຍາກ ແລະ ຂັ້ນການບົວລະບັດຮັກສາຄືແນວໃດເພື່ອໃຫ້ມີສະມັດຕະພາບທີ່ດີ, ນອກຈາກນັ້ນ ຍັງເພື່ອເປັນການຖອດຖອນບົດຮຽນເພື່ອນຳໄປຈັດຕັ້ງຜັນຂະຫຍາຍໃນແປງສາທິດຂອງກຸ່ມບ້ານຕົນ.